【創意設計】【4K裸視3D電視 屏幕前激凸半呎】


裸視3D都靜咗好一段時間,原因無他!技術感覺畀人一直唔係咁成熟,真係好容易睇到人頭暈;如果大家記得幾年前嘅裸視3D手機,假若有親身用過,大家都應該記憶猶新。

最近裸視3D電視又一次再戰江湖,不過今次就加咗4K嘅超高畫質,係喺同類產品中首見;今次為我哋帶嚟新產品嘅,係德國品牌exceptional3D;佢哋對3D技術開發已經有70年歷史,當中裸視3D技術,更喺九十年代開始已投入研發。呢款新一代裸視3D電視,最特別之處係用咗精密嘅3D雙凸透鏡技術進行顯影,4K電視屏幕嘅前方,有一塊幾近1cm厚嘅玻璃片,就係佢做成光嘅折射效果,從而模擬出3D效果。

比較以往舊式嘅裸視3D屏幕,一般嘅立體感都只能停留喺「屏幕表面」,但exceptional3D新開發嘅裸視3D技術,可以做到凸出屏幕以外「近半呎」嘅效果,感覺已更貼近需配戴「3D眼鏡」嘅3D電視。據知新嘅裸視3D技術,可視角度更高達178度,而且視點亦達16點,相對已往舊式設計只有8點,感覺可觀性更高;不過假設未能「對正位」,會出現壇影嘅問題,與同類裸視3D電視一樣,暫時仍未能解決。

exceptional3D暫時到港嘅,就只有 EX3D4K-559一款中階型號;機身行LED背光技術,解析度達3,840 x2,160、對比度4,000:1、光亮度650cd/m2。據知同系列產品,會由10.1吋/2K裸視3D平板屏幕,以至最高階的84吋/4K裸視3D電視都會推出。



Comments