【創意設計】【Microsoft 新 Surface Pro 玩足13.5小時】

Microsoft新Surface平板電腦終於正式登場，而名稱亦一如所料只稱為Surface Pro。外形上同上代嘅Surface Pro 4可謂冇分別，升級部份嚟自硬件，如會採用以14nm製程嘅第七代Intel Core處理器，能令電池續航力提升到13.5小時，比上一代增加50%；而所配嘅12.3吋屏幕嘅解象度亦提升至2,736 x 1,824，另外亦會推出LTE版本型號。另外新Surface Pro嘅新PixelSense屏幕具備4,096級筆壓敏感度，精準度亦會比之前提升一倍，配合Surface Pen操作，繪圖更得心應手。香港方面會喺5月26日開始接受預購新Surface Pro，正式推出日期為6月15日，定價將由$6,988起。不過參照番香港同美國方面嘅價格，以配上Intel Core M3/128GB SSD嘅最平型號比較，香港定價$6,988，美國方面就只係799美元 (約$6,221)；至於配i5/128GB SSD型號，香港定價$7,888，美國方面就只係999美元 (約$7,778)；至於配i7/1TB SSD貴價型號，香港定價$20,888，美國定價2,699美元 (約$21,014)，照咁睇喺香港購買高規格Surface Pro型號先至抵。