《RoboCop》(《鐵甲威龍》) 已經係30年前嘅電影，到底現實世界之中幾時會有機械人警察呢？杜拜啱啱就公佈咗會派遣機械人警察喺街上巡邏，不過外形方面就同電影《RoboCop》嘅機械人警察相差得好遠好遠！呢個杜拜版RoboCop係由杜拜警方聯同IBM's Watson同Google合力設計，但就唔好期望佢會跑住捉賊或同悍匪槍戰，佢係識得行禮、鞠躬同識講多種語言，而且亦能辨認到1.5米外嘅手勢，某程度上似一個親善大使多過一個警察。雖然杜拜罪惡率向來都唔高，但如果想同機械人警察報案都得，就麻煩大家要用佢心口嘅平板電腦輸入資料。據報導指出，杜拜警方仲諗住會大量生產機械人警察，希望到2030年時可取代四分之一嘅警力，到時連警察都要失業。
Comments
Post a Comment