【休閒遊戲】【迷你版超任內置21款遊戲 收錄未推出遊戲《Star Fox2》】

當月前迷你版紅白機停產，機迷都估到任天堂係為迷你版超任鋪路，終於任天堂都正式發佈，會喺今年秋天推出迷你版超任。同之前迷你版紅白機一樣，迷你版超任都有日版同美版兩款，日版全名「Nintendo Classic Mini Super Famicom」，今年10月5日推出，定價7,980日圓 (約$558)；至於美版「Super NES Classic Edition」就會喺早一個禮拜推出，9月29日面世，定價79.99美元 (約$623)。無論日版或美版迷你版超任都會預載21款超任遊戲，大路遊戲如《Super Mario World》、《薩爾達傳說：眾神的三角神力》、《F-Zero》、《Street Fighter II》、《Super Metroid》同《Super Mario Kart》兩邊都會落齊，而且仲會加入首度推出嘅《Star Fox2》，但兩個版本部份遊戲就唔相同，日版方面亦會收錄《超魔界村》、《魂斗羅Spirits》、《Super Mario RPG》同埋《Final Fantasy VI》等遊戲，牌面方面就非常吸引，相信好有機會賣到缺貨。