【休閒遊戲】【世嘉五代復刻 內置85款遊戲兼玩到遊戲帶】

其實早喺任天堂推出迷你版紅白機同灰機，AtGames已推出內置Sega同Atari遊戲嘅主機，但講到能勾起玩家購買意欲，應要數到即將於9月推出新版本Sega Genesis Flashback。Sega Genesis即係當年喺香港被稱為「世嘉五代」(Mega Drive) 嘅歐美版本名稱，而呢款Sega Genesis Flashback顧名思義用上當年「世嘉五代」造型，可插入當年遊戲盒帶玩之餘，機內亦已內置咗85套遊戲，包括《獸王記》(《Altered Beast》)、《戰斧》一至三集 (《Golden Axe I/II/III》)、《Virtua Fighter II》、《影武者》(《Shadow Dancer》)、《夢幻之星》系列 (《Phantasy Star》)、《真人快打》系列 (《Mortal Kombat》) 同埋多套《超音鼠》(《Sonic》) 遊戲，童年回憶返晒嚟！而且呢部Sega Genesis Flashback配備兩個無線手掣同支援720p HDMI輸出外，亦支援即時存檔系統，就算卡關都唔需要重頭玩過。廠方表示Sega Genesis Flashback將會喺9月推出，不過價錢方面未定，但以AtGames之前同類產品只定價60至80美元，相信新機亦唔會太貴。