【食譜】【湯鮑變溏心鮑｜陳皮煎雞｜橙皮甜麵醬燜五花腩】

鐵漢李家鼎 (鼎爺) 深藏不露，一手鬼斧神工嘅廚藝功架，教觀眾眼界大開！為咗滿足觀眾嘅「添食」要求，新一輯《阿爺廚房》載譽歸來。鼎爺再次施展廚藝「真功夫」，聯同食得嘴刁嘅「好拍檔」譚玉瑛 (阿譚)，奉上傳統粵菜嘅美味。鼎爺同阿譚每集走訪街市、店舖實地選購心水食材，同即席分享揀選優質食材嘅「小貼士」。鼎爺繼而精心設計特色菜單，炮製各式各樣嘅湯水、小菜同甜品，將一道道幾近失傳嘅懷舊粵菜呈現觀眾眼前！

只要巧花心思，平價食材亦可烹調出媲美高級菜餚嘅滋味。鼎爺化腐朽為神奇，奉上一道「湯鮑變溏心鮑」，價錢相宜嘅罐頭湯鮑竟可煮出貴價乾鮑嘅風味！食材專家亦教大家喺罐頭上查看鮑魚淨重等實用資訊。

鼎爺施展「鼎級」刀功，將雞肉妥善去骨後，用陳皮蓉簡單醃味，繼而煎成香脆肉嫩嘅「陳皮煎雞」。平日食過橙肉後，大家往往會將橙皮棄掉，但其實橙皮亦可入饌。鼎爺帶嚟清新不膩嘅「橙皮甜麵醬燜五花腩」，仲會講解乜嘢係新橙、舊橙。