【日本】【食咖喱抽高達模型 特別版匙羮做武器】



▲ 拎住匙羮做武器嘅特別版高達模型

日本太多好嘢食,可能大家去日本旅行時未必會幫襯咖喱連鎖店CoCo壱番屋,不過各位高達迷如果今個暑假去日本旅行時,記得去食下咖喱,因為隨時會抽中一個非常特別嘅高達模型!只要由今年7月14日至8月31日到日本CoCo壱番屋消費滿900日圓,憑收據就可參加抽獎,有1,000個幸運兒可獲得特別版「HGUC1/144 RX-78-2 Gundam CoCoICHI」模型,除咗機體用上電鍍配色之外,高達所持嘅武器由原有激光劍換成大型匙羮,可以掛喺背脊之餘又可以用手拎住,非常過癮;就算抽唔到特別版高達都好,另外都有高達咖哩碟 (300名)、特別版高達匙羮套裝 (300名) 同埋CoCo壱番屋1,000日圓Coupon (1,000名)。雖然獎品總數只有2,600件,認真唔算多,不過參加抽獎嘅門檻非常低,正常食碟咖喱飯都幾百日圓,就算一張收據未夠900日圓,都可以用上多張收據湊夠數,無論郵寄或用手機傳送至指定網站都可以參加。

網址:http://www.ichibanya.co.jp/cp/gundam2017/



▲ 高達咖喱碟(左),特別版匙羮套裝(右)。



コメント

今週熱門文章