【RTHK】【順利村|選購衛浴設施|為愛遷居】


【民生無小事】
順利村係一條擁有約40年歷史嘅舊村,大部份住客係老人家,當中更多係獨居老人。每當長者冇帶鎖匙,喺家門外徬徨苦候時,扎根順天邨近三十年嘅開鎖匠鄭錫如(人稱錫記),總會拖住沉甸甸嘅行李篋上樓幫住戶開鎖,除咗收費低於市價,有時更免費為長者換鎖或維修水喉,甚至不厭其煩教授佢哋家居知識,佢似一條鎖匙開啟長者心窗,聽盡孤單心事。阿怡係另一位精品店老闆,雖開鋪4年,卻贏盡長者同學生嘅歡心,佢不僅幫長者上網訂購東西,仲解答各式各樣疑難,亦讓學生們多咗一個放學後休憩嘅地方。喺街坊心目中,佢唔似老闆,卻更似一個好朋友。錫記同阿怡,更被公公婆婆選為心目中嘅友善商鋪。遠親不如近鄰,鄰里關係愈趨冷漠下,卻仍然有商鋪主動向區內長者伸出援手,每日打開嘅不只係一把鎖,一個話題,更打破人與人之間嘅隔膜。

【有乜咁蹺蹊】
屋企住上一段日子後,如果想重新裝修一番,第一步往往會從浴室著手。浴室雖然佔據我哋家居面積唔大,但使用率卻好高,時間耐咗,衛浴設施例如浴缸、馬桶、水喉、面盆等比較容易損耗。所以每個家庭喺裝修浴室或選購衛浴設施時都慎之又慎,不僅高度關注馬桶嘅款式,浴室櫃嘅質料,面盆嘅高低、水龍頭嘅閥芯或電鍍層等等……。務求喺外觀或實用性上都令我哋生活得更舒適更健康。想了解更多,請留意「裝修有法」系列,詹SIR會教大家喺選購衛浴設施時嘅注意事項。

【港人港住】
加拿大人Brett數年前嚟香港工作假期,本來打算幾個月後便離開回到加拿大,怎料一見鍾情愛上Saron,於是便決定為愛留港。當初Brett就係適應唔到香港急速節奏同埋狹窄嘅生活空間,打算離開。究竟Saron點樣協助丈夫適應環境?作為外籍女婿,Brett又點樣同言語不通嘅外父外母溝通?有乜原因令佢哋留港定居而暫不選擇加拿大?

香港人阿Sing喺波蘭旅遊時遇見Paulina,二人相戀一年後,Paulina不惜放棄當時未完成嘅學位課程,不顧一切飛到地球嘅另一面,與阿SING共邂連理。Paulina第一次嚟香港便立即被香港文化深深吸引,繼而製作Youtube channel同Facebook Page「My Hong Kong Husband」,向世界介紹香港。究竟有乜吸引之處,令Paulina欲罷不能?現時因阿Sing工作關係而定居愛爾蘭,佢哋又有冇諗過回流香港生活?

今集兩對夫婦會喺節目現身說法,分享各自嘅愛情故事,同埋喺香港及外地生活經歷。

順利村
選購衛浴設施
為愛遷居

▼ 第二十三集



Comments