【阿根廷】【可能係世界上最好嘅哈利波特主題Café】

哈利波特電影深得全球大人細路嘅追捧，同時已經出現咗好多周邊嘢，哈利波特乜乜乜，咖啡館都唔只一間啦，但呢間位於阿根廷布宜諾斯艾利斯嘅 Felix Felicis & Co. 就多次被人讚賞為最好嘅哈利波特主題咖啡館，一睇到貓頭鷹嘅咖啡館 logo，小編都好想知佢究竟有咩魔法？咖啡館全部用木枱櫈，舒適簡潔，就咁睇個格局，同一般咖啡館無咩分別，但魔法喺晒啲細緻位，好似馬桶係魔力嘅通道、咖啡杯、魔法道具、魔法字體，穿過9又3/4月台，仲有好多電影入面嘅小擺設，不過，真正有魔法嘅，係老闆之一兼咖啡師 Natalia Montoya。經佢手沖嘅咖啡，真係好有魔力，個個飲完都讚口不絕。佢同佢個仔都係哈迷，自己仲將貓頭鷹嘿美紋咗喺右手度，睇嚟魔法嘅秘密，就喺佢隻右手。