【澳洲】【熱捧草泥馬肉 低脂膽固醇】

相信大家都對草泥馬，即係羊駝唔再陌生，其趣怪樣深得男女老幼喜歡，唔少人專程去外國睇，甚至有草泥馬 Café，萌樣實在令唔少人為之傾倒。不過近年澳洲人就唔係好理喇，竟然興起食羊駝肉！澳洲本身有唔少牧場有養羊駝，本來多用作產毛，近年唔少牧場開始向餐廳推薦羊駝肉，目前全澳洲有70多間餐廳已經有羊駝食，而且愈嚟愈受歡迎，因羊駝內含豐富蛋白質，而且口感介乎於羊肉同牛肉之間，肉質上乘，非常鮮味，最最最重要係脂肪同膽固醇極低，最適合依家嘅健康飲食趨勢！唔少澳洲大廚都開始嘗試以羊駝肉入饌，有大廚更認為羊駝嗰條長頸中嘅肉，肉質最為上乘。不過就唔係每位客人都 Buy，首先羊駝肉唔平，每公斤賣400多港元，其次係始終由得得意意嘅羊駝身上而來，唔少客人都直呼不忍。其實唔少高檔場合已經開始睇到羊駝肉，例如早年前嘅墨爾本美食紅酒節中，羊駝肉已經成為其中一道主菜，用作配搭紅酒，地位可見一斑。