低頭族原來已經成為國際性問題，世界各地都因為大家顧住玩電話，造成城市上出現唔少危險，最明顯當然就係交通，除咗駕駛人士會因為用電話而分心，行人亦只顧低頭睇電話，導致交通意外大增。就澳洲悉尼新南威爾斯州，今年已經有31位路人因此而死亡，比2014年時大升50％！當地政府為咗保障國民安全，決定豪擲140萬港元，喺悉尼市中心商業區等5個最旺地帶安裝地面交通燈！今次認真係低頭族嘅福音，紅燈時，地面交通燈亦將變為紅色，令低頭族仍能用眼睛睇到餘光而小心。道路安全廳長就表示，一直以嚟都有向行人同司機宣傳道路安全訊息，要求大家唔好只顧玩電話，但按照數字嚟睇，似乎成效唔大，既然係咁，惟有主動幫佢哋，保障佢哋嘅安全。不過網民就兩極化，有人話唔應該為低頭族而額外設新裝備，因為個人安全應該係自己責任，唔應該要政府遷就，擔心會養成壞習慣，禍及下一代，你又點睇？
Comments
Post a Comment