日本同台灣不時都有稻田畫，以一片青色稻田作畫布，加入唔同顏色，顏色隨季節變更，場面壯觀。最近阿爾卑斯山都有一幅，不過唔係稻田畫，而係瑞士 Leysin 山腰嘅草地畫。作品由法國藝術家 Saype 創作，佔地過萬平方公尺，草地上有一個戴鴨嘴帽、着工人褲、叼著煙斗、瞓喺地下嘅老人家，不禁令人諗起《飄零燕》嘅爺爺。可能你會問，用咁多顏料咪會影響生態？今次繪出「爺爺」嘅黑白灰三色，係用麵粉、亞麻籽油、水同可生物分解嘅天然色素繪成，頂多都係修剪下周圍嘅草木，但絕對唔會破壞生態，亦唔會久存於山上，三個禮拜後，「爺爺」將自然消失，回歸原始樣貌。但幅畫大到要坐直升機先睇得到，究竟 Saype 係點畫㗎？！
Comments
Post a Comment