【瑞典】【街頭現超微型餐廳 專門招待過街老鼠】

喺瑞典馬爾摩街頭嘅轉角位，竟然新開咗一間超微型餐廳！不過呢間餐廳嘅服務對象唔係你同我，而係一眾「過街老鼠」。瑞典一個老鼠關注組織「Anonymouse」，花咗近一個禮拜時間，利用樽蓋、電線、鋁罐、火柴等等廢料，完成咗呢間老鼠小食店。唔好睇佢舖仔細細，入面五臟俱全，放滿咗堅果、餅乾，旁邊仲有露天茶座同老鼠電影海報。到咗夜晚，餐廳仲會亮起黃色小燈，老鼠們就唔怕摸黑迷路喇。