【印尼】【大床位戲院 被政府下令關閉】

睇電影係一種享受，聲畫之外，如果座位舒適的話更加連套戲都加埋分呀！印尼就有一間號稱全國最舒服嘅戲院，因為全間院係冇櫈，只有幾十張 King Size 大床呢！冇錯喇，呢間戲院就係希望觀眾可以舒舒服服睇電影，好似喺屋企一樣大字型攤喺度，攬住另一半，甚至全家老幼一齊觀賞電影之樂。床上仲有枕頭、毛毯等，豪華程度不失於五星級酒店嘅大床呢！但係自從呢間戲院出名之後，收到唔少人投訴，認為戲院中全部係依偎嘅男女，甚至喺床上做起苟且之事，不時都傳出陣陣吟呻聲同喘氣聲！須知道印尼係回教國家，對男女之事非常敏感，連街上公然拖手都唔得，何況有人公然喺公眾場所做啲咁失禮嘅嘢？而且政府仲覺得會令人作出通姦等罪行。於是政府下令，全國所有有床位嘅戲院必須停業，重新改裝成為傳統電影櫈先可以重新開業喎。戲院老闆當然喊苦啦，更話：「通姦者就算冇戲院張床，一樣會通姦」。不過都話惟有照政府嘅政策行事，睇嚟印尼呢種大床戲院，從此絕跡喇。