好多人都想流浪，但無啦啦邊有衝動辭咗份工去浪遊呀，畢竟手停口停呀！但嚟自荷蘭嘅情侶 Jeroen Bosman 同 Hedwig Wiebes，前者經營一間創意機構，而後者就係一名自由記者，佢哋喺上年決定賣咗喺阿姆斯特丹嘅屋，嘗試去搵佢哋渴望嘅生活方式。Bosman 話 ：「我覺得我哋需要一啲新嘅嘢，一啲有挑戰性又唔同嘅嘢，然後係一邊旅行一邊做嘢！」佢哋認為，依家並唔係局限於一個地方，所以佢哋就諗點解唔帶埋個屋企一齊去旅行，於是佢哋買咗呢架露營車，仲幫佢改咗個名叫 Chewie，開展咗呢種「工作遊牧民」嘅生活。佢哋仲幫 Chewie 準備咗兩舊家用電池，係屋頂上面加咗一塊好大嘅太陽能電池板，所以佢哋可以隨時隨地生產電力。Bosman 就話，佢哋依家可以想去幾耐旅行都得，好享受呢種自由自在嘅生活方式。佢哋先從阿姆斯特丹岀發，橫跨比利時同法國。開車穿過西班牙，然後喺葡萄牙住過兩個月。依家佢哋就喺摩洛哥，佢哋除咗讚當地嘅人都好好，仲有好靚同多樣性嘅風景，有湖泊同美麗嘅綠色山丘。而且物價低廉，當地嘅生活質素好好。喺行程之中，佢哋喺星星嘅天空下渡過咗無數個夜晚，仲見證咗無數個日落添。佢哋兩個希望激勵其他嚮往遊牧生活方式嘅人去追求夢想，仲喺佢哋嘅 Instagram 帳戶度分享佢哋嘅冒險過程，大家都參考啦！
Comments
Post a Comment