【料理知識】【細細粒奇異莓 維C勝蘋果】

當行超市時或會發現一種外表呈青色，類似青梅、青提子或青色版車厘茄嘅生果，原來係奇異果嘅近親奇異莓 (Kiwiberry)，又名軟棗獼猴桃、迷你奇異果或寶貝奇異果，係新西蘭近年研發嘅新品種。奇異莓只有5至20克重，含豐富維他命同抗氧化物，適量進食可減低患上心血管病同癌症嘅風險。營養師話，同奇異果一樣，奇異莓含豐富嘅維他命C，食一粒細小嘅奇異莓，維他命C嘅攝取量比食一個大蘋果更多，較柑、楊桃同蜜瓜更高出4.5倍。因食用方便，啱晒嗰啲平日因繁忙少食生果嘅上班族。奇異莓可以連皮食，體積近似車厘茄，果肉味道比普通奇異果清甜，但唔及金奇異果咁濃味，果皮有少少酸味。奇異莓比一般奇異果含較多草酸，對於有腎石嘅患者，就唔好食咁多喇。成人維他命C每日建議攝取量為男士90毫克、女士75毫克，進食約100克奇異莓已幾乎可達標。