【手工藝 DIY】【龍珠超精「細」人物載具模型 1/4個一毫子都睇清塊臉】



MECHA COLLECTION系列暫時只出咗兩款,
而且價錢鬥得相當厲害,$41已經可以買到一盒。

近期Figure-rise Standard嘅龍珠模型大熱!最初打響頭炮嘅斯路,以雙夾層砌出原設定嘅上色效果,已經叫好多人拍案叫絕;再加上近排推出嘅人造人17號、18號,老實講!呢兩個角色出過嘅產品唔太多,亦係令唔少非模型狂熱嘅「玩具迷」,都要買返隻嚟玩吓。

今個星期最新到嘅,係MECHA COLLECTION系列!佢係一個「載具加人物」系列;如果你係老模型迷,一定會聯想起《IQ博士》模型系列中,小雲坐龍又或者曱甴王等經典模型。不過以今天Bandai嘅造工,當然唔會再出現左、右兩邊夾唔埋,甚至部件唔對位等問題。初上手感覺分件相當精細,如果細看人物角色臉相,儘管整張臉只細如四分一個「一毫子」,但面部表情,以至深深嘅刻線位,對上色方面亦有好大幫助。

買下時有兩個感動位,第一個係喺模型盒嘅側邊,只要一盒盒順序拼合,就會變成為一幅連貫嘅長畫;呢一招好明顯係取經自漫畫單行本,因為當年嘅《龍珠》漫畫書書脊,都係用同樣嘅設計。第二點係每盒模型都有特別Parts,只要你買齊全系列7款,就可以拼合成第8隻嘅雙螺旋槳戰鬥機--Bulma's Romantic Fighter Plane。另外初會特典嘅小書中,仲公佈咗全系列產品內容,須知就算係日本官方網站,都只係公佈到第4款!佢哋順暢排列分別為Bulma's Capsule No.9 Motocycle、Ox-King's Vehicle、Lunch's One-wheel Motorcycle、Son Gokou's Jet Buggy、Yamcha's Mighty Mouse、Oolong's Road Buddy同埋Master Roshi's Wagon等。



盒邊設計都花過心思,
一盒一盒連起嚟,就可以變成一幅長畫。



模型啲Parts唔算多,而且造工非常精細;
但更希望廠方可推出分埋色嘅大比例模型,
因為上色時會來得更方便。



模型砌好後,你會發現有餘件出現,
千祈唔好整唔見佢呀!
7盒嘅餘件拼湊起嚟,
就可以砌出Bulma's Romantic Fighter Plane!



初回特典仲有書仔送,會話你知呢個系列
將會有乜人物同載具登場,
而且每一架都有詳細嘅透視圖作解構。



コメント

今週熱門文章