【手工藝 DIY】【日本模型高手 自製MX-5 RF電篷】

模型車可以整得好精細，噴油可以噴得超完美，不過呢部除咗以上元素外，仲加咗電動機械裝置用嚟開篷，完全重現Mazda MX-5 RF真車嘅電動開篷硬頂設計。日版名叫Mazda Roadster RF (ロードスターRF) ，海外版本就係我哋熟悉嘅MX-5 RF，係硬頂開篷版，而開篷嘅動作比軟篷複雜，就係要先打開車尾冚，再收摺起硬頂，之後再關上尾冚，呢部模型車竟然可以完全自動重現。模型車出現喺啱啱週末舉行嘅「靜岡Hobby Show」中嘅「第28回モデラーズクラブ合同作品展」，即係畀自家改裝模型一個展出嘅機會，所以呢個係非賣品嚟，想擁有就要研究一下、自己動手喇。