【創意設計】【最強平衡車 Kiwano K01 厚轆+避震+自動郁+WiFi連手機遙控】


雖然香港好多地方都唔畀玩,但平衡車喺世界各地都越嚟越多人玩 (張志明都狂玩兼引到靚女),款式自然越出越多。最近外國公司Kiwano即將推出一部功能相當強勁嘅平衡車「K01」。新車以單轆加手柄設計,外形比一般平衡車簡約細小,比較特別係佢個車轆有相當嘅厚度,加上設有彈簧避震系統,行車會比一般穩定。喺官方影片可見,K01上落壆位都全冇難度,用家甚至可以做到跳躍動作,靈活性絕對比現時嘅平衡車強得多。

K01其實仲有唔少可觀嘅功能,例如手柄上有LCD顯示屏,顯示電池速度等行車資料;更可以WiFi連接手機,利用手機為K01上鎖解鎖之餘,甚至可遙控平衡車移動,用家即使落咗車亦唔使推車。K01仲有防水功能,內置前後LED指示燈,更可應付唔同地型如沙地草地,甚至上斜等,似乎相當適合作為城市嘅代步工具。

不過要作為代步工具,續航力亦係關鍵,K01就設有4.4Ah電池,聲稱最高速度為20mph,最多可行走20英里,即32公里有多,算係相當長氣,最厲害係叉滿電只雖1小時。另外佢最高仲可負重250kg,綜合各項性能,K01都可以話係最強嘅平衡車。不過又係嗰樣喇,K01暫時似乎仲未有現貨,只有網上預購,聲稱將於今年7月開始發貨,預購價為799美金 (約港幣$6,232) 比佢哋講嘅正式售價999美金平咗200美金。講真,個人覺得6千幾如果真係買到咁嘅性能嘅平衡車,其實算係抵玩,不過當然要見到實物先知係龍定鳳,事關呢類網上騙案例子實在太多。

網址:https://www.kiwano.co




Comments