【創意設計】【Marc Newson 嘅手工玻璃沙漏 HODINKEE】


沙漏基本功用係用嚟計時,不過講緊係一百幾十年前,依家用鬧鐘、手機或智能手錶計時都唔知幾方便。但啱啱有位設計師設計出一款名為HODINKEE嘅沙漏,開價12,000美元,預訂時要先畀6,000美元,仲要冇得退錢,然後再要等幾個月先收到貨,到底有咩咁值錢先?首先呢款高15cm、重3.3磅嘅HODINKEE沙漏手工非常精細,手造玻璃外殼精瑩剔透,當中用嚟計時嘅「沙」其實唔係沙,而係加上銅同防蝕外層而且直徑只有0.66mm嘅迷你不銹鋼珠,每個沙漏會裝上約1,249,996粒呢種迷你小鋼珠,當然實際點樣數到咁精準就不得而知。但講到最貴之處,好有可能係嚟自HODINKEE設計師—Marc Newson。Marc Newson係世界著名設計師,亦參與設計Apple產品,如果大家已擁有其他所有Apple產品並且有多餘嘅12,000美元可花,呢個可計時10分鐘嘅沙漏都值得考慮喎。




コメント