【美國】【首批基因改造蘋果獲准發售 超市買得到】

基因改造食物，喺近十年八年社會一大議題，改變食物基因，令食物嘅生長速成、生長成效大大增加；不過同一時間亦備受非議，因為呢種非天然嘅食物，其實算係一種畸形物品，一旦成為風氣，恐怕日後大家食嘅食物都會係基因改造，例如牛、豬、羊。不過近日美國就正式打開呢道「潘朵拉盒子」之門，正式批准一種基因改造蘋果公開發售。名為「極地蘋果」(Arctic Apple)，從外表睇嚟同一個普通青蘋果冇分別，不過極地蘋果最令人驚異之處就係唔會再好似一般蘋果咁，切開一陣就會因為氧化而變黑，極地蘋果能夠透過基因改變而做到抗氧化嘅效果。而當科學家掌握咗呢個技術之後，日後仲可以令蘋果變成抗寒、抗熱、抗蟲等等。當然，因為改變咗農作物嘅基因，同時會令害蟲基因一同改變，一環扣一環，有機會造成生態災難。極地蘋果嘅生產商Okangan Specialty Fruits就話改造只限於蘋果嘅氧化成分，唔會影響到果樹或者種子。不過今次基因蘋果可以上市，亦代表其他公司將會仿效，各位將會愈嚟愈多機會買到基因改造食物喇。