【北韓】【北韓版iPad 有得玩App兼可上網】

北韓科技水準有幾先進，常人係冇辦法知道，但近日網上流傳北韓已經開發出自家iPad......其實係IPad先至啱，證明科技水準突飛猛進！近日NK News就喺北韓發現一部稱為Ryonghung IPad平板電腦嘅宣傳單張，列明平板電腦配備4核1.2GHz處理器、1GB RAM、8GB儲存、HDMI端子同具備網絡功能 (但似乎只能連接內聯網)，亦可以運行到多達40個自家開發嘅應用程式，不讓美國Apple專美。不過網站同時發現呢部「新IPad」同2013年喺北韓「發現」嘅Android平板幾乎完全一樣，而且硬件規格明顯過時，懷疑只係廠方改個新名促銷，亦順道挫下美國銳氣；不過呢款Ryonghung IPad只會喺北韓內銷，用家應唔會覺得產品過時。翻查紀錄，北韓「參考」美國科技產品素有前科，兩年前平壤舉行嘅貿易展上已展出過外形同iMac 99%相似嘅北韓電腦，同期亦開發出同Apple OS X非常相似嘅Red Star3.0操作系統，證明北韓科技水準絕對唔講得笑，假以時日超英趕美絕不是夢。