好多人鍾意旅行去玩潛水，不外乎睇海底景色，海洋動物、破船、古跡、珊瑚等等，不過以下呢個介紹嘅潛水新方式，保證好多人未玩過！話說克羅地亞著名酒莊Edivo Vina從5年前開始就引入一種新釀酒方法，有別於一般放入密封嘅木桶，反而將紅酒放入海底15米之處等佢發酵！呢種海底發酵技術Underwater Wine Aging，克羅地亞就正正係擁有晒最理想條件，海水溫度於10至12度之間，由於海底嘅水壓、濕度、溫度、日光等微妙關係，發酵時間比陸地少一半！ 酒莊仲特登搵嚟一批古希臘時期嘅雙耳細頸酒罐，極具當地特色，每支0.75升，用一個金屬大支架，放喺附近馬里通海灣嘅海底。5月開始，遊客只要透過旅行社就可以報名，以潛水嘅方式深入海底，挑選心水美酒。全程會有專業潛水人員陪同，安全絕無問題，撈起紅酒後，你可以選擇即時品嘗又或者帶走慢慢享用，邊種方法都好，用自己力量一手一腳潛落水打撈上嚟嘅，一定零舍好飲！
Comments
Post a Comment