【台灣】【網民投訴墾丁大街食店呃錢 反被人嘲】

就係呢兩款麵，就咁睇落又好似相差無幾。

大家都知，去旅行人在異地，就一定要食當地嘅食品，仲要去當地最旺嘅地方；如果大家去墾丁，就一定係去墾丁大街。不過日前有一單新聞，台灣一位女遊客前往墾丁大街某某餐廳，點咗兩個拌麵，一個係180台幣嘅肉燥拌麵；一個220台幣嘅三色拌麵，但嚟到之後發現兩碗麵除咗食材擺位之外，基本上毫無分別，唔明點可以當兩種麵去收費，仲Post上網「請問是我眼花？何謂三色？難道我色盲？」事後仲向墾丁大街嘅負責部門投訴。有唔少網民一開始都話墾丁大街早已遊客化，基本上都係高價收費，貨不對辦情況好嚴重，仲有唔少餐廳本身個食物牌已經過咗期都冇人理，管理極有問題。不過亦有唔少網民批評該位女食客係多此一舉，因為去得旅遊區預咗會畀人「劏」，仲話佢「冇錢咪去旅行」。不過諗深一層，大家去旅行時都一定遇過類似情況，將心比己，有時又真係好鬼激氣嘅！