【建築設計】【瑞典閃閃發光「太陽蛋」桑拿屋】

「太陽蛋」桑拿屋 (Solar Egg) 位於瑞典北部嘅基律納 (Kiruna)，係由兩位藝術家Bigert及Bergstrom共同設計同組裝，「太陽蛋」高5米、闊4米，外層係由69塊鈦金塗層嘅不銹鋼板組合而成，內部由石頭，松木，黃銅同玻璃製成，仲配有LED燈同太陽能板。室內以桑拿爐為中心，可加熱至75 - 85攝氏度，有兩層木長凳，能容納八個人。而呢69塊鋼板牆係可以自由拆卸組合，方便搬運，可以將「太陽蛋」移到任何一達地方。整個設計項目係受Riksbyggen開發商委託，希望能改善當地嘅景觀，作為城市再開發項目嘅一部分，為社區構設聚腳點同旅遊熱點。之所以採用雞蛋嘅外形設計，係因為Mats Bigert同Lars Bergstrm想強調「重生」呢個設計理念。原來，基律納 (Kiruna) 係當地重要嘅鐵礦中心，數十年嚟嘅鐵礦開採造成當地地面沉降，從而面臨城市轉型同城市整體搬遷嘅難題。因此，兩位設計師採用雞蛋造型，寓意著整個城市嘅「重生」。Riksbyggen地產銷售及營業總監Mathias Sandberg話：「太陽蛋」就正好抓住基律納嘅精神同桑拿嘅傳統。佢象徵住太陽作為創造力、關懷、希望同團結嘅催化劑。