【意大利】【佛羅倫斯禁遊客街上進食，最高罰4500港元】

意大利佛羅倫斯遊客數目不斷攀升，去年高達1,002萬人。

唔少人去旅行時為咗節省時間，可能會直接買三文治邊行邊食，而佛羅倫斯同好多意大利城市一樣，好多食肆都會收取堂食附加費，公眾地方又缺少長椅，令遊客需要坐喺街邊進食外賣食物，既唔衛生之餘亦有礙觀瞻，甚至阻礙其他商戶做生意，令當地人感到滋擾。但呢個景象應該好快就唔會再喺意大利旅遊勝地佛羅倫斯出現，因為當地市政府近日推出新例禁止任何人喺街頭食小食。

近年當地嘅美食店街都經常迫滿排隊、食嘢嘅人潮，好多遊客鐘意就地大吃起來，不僅留下大量垃圾，仲阻塞咗往來通道，唔少當地居民抱怨自己家門被遊客霸佔嚟「野餐」。因遊客過多導致日常生活上種種不便，亦令佛羅倫斯居民寧願將房屋直接租畀遊客，而舉家搬到郊區生活。

由於居民怨聲載道，意大利佛羅倫斯政府終於立法禁止遊客喺指定時段及街道上進食，以改善市容同解決亂抛垃圾問題。條例今年9月4日起生效，遊客禁止喺中午至下午3時，同埋下午6時到晚上10時等繁忙時段喺街上進食，違例者會被罰款500歐元 (約4500港元)。

市長Dario Nardella亦特別強調新例並非針對一般遊客，而係針對冇教養、喺路邊駐紮食午餐嘅遊客，嚴重影響交通，因此才決定實施此計劃，政策預計實行到明年1月，再視情況判斷係咪延長。

有啲遊客會喺街道上或坐喺建築物門口進食，加劇咗街道擁擠嘅問題。



充滿住各式各樣嘅餐飲店嘅Via de'Neri街道亦喺覆蓋範圍。