【紐西蘭】【機場新手信，零污染罐裝空氣】

每罐空氣附有面罩，確保可以吸得乾淨。

唔知大家有冇聽過一個笑話「因為食薯片，我先知原來空氣都係要錢。」呢個笑話其實唔係全部係講笑，畢竟零染污嘅空氣係好難得！紐西蘭國際機場一間免稅店近日就擺賣一罐罐嘅空氣，並聲稱係零污染，由紐西蘭阿爾卑斯山脈之中載入罐中，聲稱距離最接近人類嘅地方都有數百公里之遠，亦冇任何受污染嘅可能。罐裝仲附送一個面罩吸入器，罐後面寫住「你有諗過平日你吸嘅空氣喺邊度嚟嗎？」不過呢啲罐裝清新空氣一啲都唔平，4罐裝特價之後仍要100紐西蘭元 (約500港元)，想吸一口新鮮空氣，睇嚟真係要付出代價。其實紐西蘭呢類罐裝空氣都唔係新產品，不過通常都係放喺外國銷售，例如中國每年就賣出數十萬支，目前連印度等地都開始引入。今次直接放喺機場免稅店，等旅客唔捨得離開紐西蘭嘅陸地，但仍然可帶啲空氣返屋企！

4罐空氣就要成500蚊港紙，似乎有啲貴！



嚟自紐西蘭阿爾卑斯山脈，零污染。