【加拿大】【自駕遊拍到傳說生物「幽靈駝鹿」】

好多人去旅遊會選擇自駕遊，揸車自遊自在周圍影下相。一對夫婦日前喺加拿大安大略自駕遊前往露營地之時，就罕有咁遇上傳說生物「幽靈駝鹿」！原來呢種全白色嘅「幽靈駝鹿」，係平時嘅駝鹿但擁有罕見嘅毛色變異基因，可以話係萬中無一，由於全白色所以被稱為「幽靈」。呢對夫婦仲一次見到兩隻，可以話係極級幸運。片段放上網後好多網民都話好羨慕，話係畢生難忘嘅經驗。不過同時有網民就呼籲佢哋快啲刪除片段，怕會有不法分子去到該區捕殺幽靈駝鹿。由於加拿大有法例規定，任何駝鹿身上擁有超過50%係白色，就唔可以捕殺，因為係非常罕有。不過由於執法困難，所以基本上要偷獵一啲都唔難，希望呢對幽靈駝鹿快啲遠離馬路，返去森林之中，人類係好危險㗎，你知道嘛？