【美國】【又有動物絕種，最後一隻夏威夷蝸牛老死】

人類係全球動物嘅天敵，無容置疑，近日又因為人為嘅「錯誤」，導致一個物種絕種。日前全世界最後一隻夏威夷樹蝸牛「金頂蝸牛」(Achatinella Apexfulva) 正式離世，終年14歲，正式宣告該物種正式絕種！點解一開始話人類嘅「錯誤」呢？原來夏威夷蝸牛喺幾十年前一直健康生存，及至1955年時當地人發現有人帶咗非洲蝸牛過去並且開始喺當地繁殖，於是有人引入咗北美嘅玫瑰蝸牛，呢種係會捕食其他蝸牛嘅物種，希望可以將非洲蝸牛全部趕盡殺絕；但估唔到玫瑰蝸牛去到該地後，竟然鍾意捕食原生嘅夏威夷蝸牛。夏威夷蝸牛因此大量消失，至到1997年時，當局派人將僅餘嘅十數隻金頂蝸牛帶入實驗室全力養殖，希望可以繁殖到下一代。可惜多年嚟一直未能成功，近十年嚟，只有呢隻被稱為「Lonely George」嘅倖存。縱使蝸牛係䧳雄同體，但始終都需要多一隻同類先可以繁殖，只能眼白白睇住Lonely George離世。科學家已經將佢啲DNA冷藏，希望有朝一日可以復製出Lonely George。